Che ato se pò ffa

'E DECUMANE 

Neapolis, comm' aimmo ditto primma, fuje fundata d'e Cumane cinche-seiciento anne primma ca nascette Cristo. Sta «città nova» fuje custruita 'e 'na manera ca se chiamma ippodamea : tre decumane est-ovest (via Tribunale, via Anticaglia e via S. Biagio dei Librai) se 'ncrociano cu 'e carde, viarelle chiù piccerelle ca vanno 'a sud a nnord. 'Ncoppa nce hanno custruito ati Nnapule (Napule medievale, Napule spagnola). Ma chella primma forma llà se vede sempe e se pò visità. L'Unesco ll'a dichiarata «patrimonio dell'umanità»: 'e tre decumane, ncruciannese cu' 'e  carde, fanno 'na somma 'e strade tutta speciale ca se trova sulo a Napule.
Napule nun vuleva cumbattere, ma vicino teneva 'e Sannite. 'E Sannite se pigliajeno a Cuma –'o 423 – e nne mannareno tutt'e cumane. Ma Napule s'avetta difennere pure d'e Romane. 'O pprincipio erano amice, ma cchiù appriesso nun ghiettero chiù tanto d'accordo; quanno fuje 'o 326 (se parle sempe 'e primma d'a nascita 'e Cristo) se scuntrajeno e Neapolis abbuscaje. C'a pace ca facettere addeventajeno «confederati». Napule putette rimané abbastanza n'grazia 'e Ddio, e nun facette maje piglià collera 'e Romane ca addeventaveno sempe chiù fforte.